بن فليكة - هشام الجبالي

 بن فليكة - هشام الجبالي 

نتذكّر وقتها نكردي في الدخان من حانوت في الحومة و ندبّر دينار من عند فطّوم متع قهوة ، بابا مروّح عساقيه للدار تعدا ياخو في الخبز فضحني الحوانتي ، بابا خلّص و روّح هنتلني و يخرنن و عمل حالة و نا اقتلني و متنبزنيش و متقليش كلمة ، الحال صيف و كي غير كملنا الاكزامانات و منعرش على روحي لا ناجح ولا كنترول و لا مدوبل .. غاضتني من بابا و توجعت و كرّزت، عندي تليفون غبيّ و نا و بن فليكى كنّا على اتصال في وسط العام هانو ساعة ساعة نكلمو نسئل و نسئل عبناتو و اكهو و كنت نتبولد عليه و نقلو كي نولي وزير ناسبك و تعطيني وحدة من البنات ، ضاقت بيا الدنيا. منحبش نمشي للسّاحل منحبش نمشي لمستير و لبو حجر و معادش نحمل نخدم مرمّة غادي ، أول عشرلاف خذيتها وقتها من عرق جبيني في المرمة كانت في بوحجر ، مشيت بحذا بعض الاقارب و كان معاهم خالي الكبير شيفور سومي و مكانش ديما متواجد غادي ، قبل كان حنين معايا و لتوا بالقدر و نعزو رغم لي علاقاتنا عادية جدا ، منيش فاهم حتى شي 14 سنة و منيش سمين كي توّا و نا منعرش فين يسكنو هوما ، مشيت مع واحد في لواج لسوسة و من بعد بدلنا لقصر هلال و هبطنا في بوحجر فين معمل الكوش ، هازز صاكي و نتبع فيه و نضحكو ، دخّلني لشانطي ، فيلا كبيرة الباب متع الصّور بتيّة مصددة حالينها بالطول و رابطينها بالتلّ ، الفيلا مليّقة من البرّة كهو و من داخل كلها حمراء ياجور ، الشبابك مفمش و لا بيبان ، فما كان هاكا الجعب متع الضوء ، نا مصدوم و موش فاهم شي ، عاملين باب للبيت الي فيها تلفزة و نطيبو فيها و كعبات منا يرقدو فيها ، الشبابك مسكّرين بالياجور فارغ و الشمس داخلة من النقب و انت قاعد في وسطها السخانة كيما من برّة كيما من داخل ، نا مصدوم و نخزر و الي معايا شايخ عليا ضحك ، هزيت راسي نشوف في بوكشاش متعدي يجري زعرورة ، حلّ التلفزة و نا بهمت قلي خوذ الفرش هاكا فلان في البلاد وقت حصيدة ميجي كان في دخول الذري للمكتب ، ترميت بكلي عالفرش يطيح بيا بكلّو ، نا ماشي فيبالي فرش طلعو ياجورات محطوط عليهم زوز قصايص مادري و كعبات بلونش و لازمك تعرف كيفاه تركح روحك مكانش يطيح بيك ، كمّل ضحك عليا .. قتلو نحب نمشي لتوالات ، دورني من بركون و قلي السبالة هاويني عبي دبّوزة و هاني توالات وراء الدار ، قتلو ا نمّي توالات وراء الدار ؟! قلي اي و دخل للبيت ، السبالة لاصقة في الصور من داخل و مقابلنا عطّار كي هابط رميت كحلّ ، شفت فيه مرا كبيرة يعني لا تبزنيسة و لا بلادة و وصاني هوا بلاد الناس و منعرش شنيا تقول مسافرين البرّة ، عبيت الدبوزة ، شقف متع صابرين فارغ و نلقا لقش صابون صغار محطوطين فوق ياجورة ، هزيت منهم وحدة و مشيت ، ساعة مفماش باب اصلا ، التوالات عبارة على حفرة و فوق منها لوحتين خشان عالاخر لازمك تركّح روحك و تخرى شبه واقف و تجيبها في بلاصتها و ترد بالك لا تزلق تهبط في قلبها !! فماش كلمة زايدة ما قلتهاش نهارتها و قلت تخرنين فرحات و لا الهمّ هذا ، اكهو عملتها حاشاكم و جيت نمد في هاكا الصابونة زلقت من يدي و هبطت ، كملت نظفت روحي و رجعت للسبالة نغسل في يدي و نسمع في حس قدام الحانوت معطيتوش اهميّة ، طلعت رقدت و تمديت تاعب من السفر ، ما فقت كان كي قيمني هوا عالعشاء ، قبل ما نتعشّو نتذكر مشكشك ، شدّ كردونة ، زاد فيها اسمي وقيد القضيات الي شراهم هوا متع العشاء ، نا موش فاهم شي ، مديت يدي لطرف متع الكردونة نلقاها فاها كل واحد و اسمو مناس لي يسكنو غادي و كل حدّ شنوا صرف و الحساب يجمع .. ، ستنينا جماعة جو ، تعرفت عليهم تعشينا ،ناس زواولة يحشمو و يقدرو و مكثرهم معرسين و عندهم عايلا و كنا كلنا من شمال غربي سليانة و الكاف كهو .. الدار عاطيهالهم انسان لباس عليه على وجه الفضل ميعيشش غادي و مهيش في برنامجو توا و ناسيها و فيهم شكون حتى خدم فيها قبل ، تعشينا و لعبنا طرح شكبة على قازوزة و تلفزة تخدم و البرّاد تحط على هاكا دبوزة القاز الحمراء يطيب في عقلو و ما بحكو عن المرمة ، المقاول الفلاني ، فلان علان ، خدام ، بناي ،لوح ، مادري ، ا نمي فماش موضوع اخر شي .. رقدنا فوق السطح و الناموس شواني شويان و فيبالي كيفنا احنا في الكاف ماء السبالة نشربوه عادي طلع لا فيه لا مطعم ز لا ينجم يهبط ،هبطت في شورت و خلغة للعطار المقابلنا جبت دبوزة ماء ، العطار انت تدخل و طبطب و تعيط و تسمع العرك متع شكون يقوملك الداخل و شوف يجوك شوف لا. جاتني بنية ممكن في عمري ، شعرها داخل بعضو و خرجتلي مبعد منبزتها امها و شبعة بخس .. مركزتش معاها و قضيت و عاودت رجعت ، كي جيت خارج قتلي تسكن لنّا. نعرش علاش سءلتني اما ممكن خاطر في خلعة و شورت ولا نعرش ،قلتلها اي في دار لي مقابلتكم. ضحكت ضحكة متع استهزاء و حقرة اما قتلي مرحبا.. الصباح قوموني ، حبيتش نقوم ، قلي قوم قوم فراق الاقسام يتعدا الصباح و الي عينو بالنواح يبداه عالصباح ، مشيت معاه للقهوة و خذيت حارة سواقر ، ناس كل يهزو فيا و يحطو ، جديد و اول مرة نمشي غادي و نبان اكبر من عمري ، خذيت قهوة و بقيت نستنا ، يجو يخيرو فينا كي العلالش ، يجسونا و يخزرولنا و يقلك مرتاح اليوم ولا تخدم ، المقاولين يتعاملو معانا على اساس عبيد احنا ولا منعرش المهم نظرة دونية موش قابلها ، ناس كل قصدت ربي و نا و صاحبي و مجموعة صغيرة تنقب نهارنا ، في مخّي قلت يدّها ، هزيت روحي و مروح قلت نسئل كيفاه نمشي للبحر و نعمل غطسة و نكتشف البلاد ، قريب الدار ، فما شانطي دار محسوب قريب تنظاف ، قدامها كدس ياجور بوستة و موطور 103 ،طلع راجل خشين و طويل و شلغمي ، سئلتو ببرائة ، عمي تحب شكون يخدم معاك ، هزني و نفضني و قلي اي مرخوفة ، دخلني للدار ، عرفني على بناي و خدام قاعدين يروتشو و قلي غربلهم الرمل و خلطلهم الخلطة و امشي دخل ياجور ستة و رصفو و وراني فين ، دخلت و بديا نخدم طراف اعطيه طراف اعطيه ، قطعت روحي زرب و كبس و نا جبري منفهم منها شي ، الخلطة قلبتها مرتين و طلعولي نفافط في يدي بالوقت من البالة و عرقت و تقول حلّوف في الحصيدة ، مبعد ركشت نعمل في سيجارو و بالصدفة طل عمّك علي يلقاني قاعد و مستكوزي ، قلي خدمة نمّي هذي ،حشمت نا و قمت ، قلي كمل كمل سيجاروك ، نا تعبتني الخلطة. مبعد ما قلبتها و تمرغدت بغبرة السيمان و الرمل وصلي لترمتي و صبيت فيها الماء ، صبيت برشا ماء للي جتني جارية رصتلي نكركر في الرمل و نزيد فيها باش تتكبس ، كي تكبست جت بكلها صفرا اصل ،طلّ عليا البناي قلي زيدها السيمان ضعيفة ، شيحتلي الريق الحاصل ،ما وصلت العشية و روحنا كان ما تقلي يا مشوم نقلك نا ، جاء عمك علي و مدلي عشرلاف و قلي تو كي تبدا فما خدمة نعيطلك ، بعثني نيّك بتربية عالاخر و ممكن سخفتو هاكا علاه خلاني نكمل النهار و من نهارتها لليوم و نا موش فاهم نكره المرمة خاطرها متعبة و ناس تحقرنا و توطي علينا بالعين كي نخدمولهم في ديارهم ولا نحبها خاطر تنجم تعمل اش تحب ، تكرّز تروح ، تتغشش تروح ، تحط الفن و تكحّل و تسمع حكايات من كامل تراب الجمهورية من عند البناية ، فتكم بالحديث نحب نحقق ذاتي و منحب نكون عالة على حتى حدّ قلت لا نمشي لمستير و لا نمشي بحذا حد ، نجّم نطّلفح و ندبر خدمة ، ساعة المدام طلبتها قلت هانو نرجع نخدم و هانو فما سكنة مهزتش عليا اصل ، لميت صاك ا دو و مشيت لرومبوان البياض في مدخل الكاف و الحومة و هزيت طرف صرف من الكوجينة مشاورت عليهم حدّ ، ممكن اقل من سويعة دبرت ستوب لتونس ، قلي فين ماشي في تونس ، بهمت قتلو اريانة و سكتت و بدلنا الموضوع ، شاري قهوة في فنجان كبير ترشفت معاه و حكينا ، قداش نرتاحو للناس الي منعرفوهمش و الي مهمش باش يعايرونا خاطر مناش شنقابلوهم مرة اخرى ، خلطت و مشيت لاريانة و مشيت مع سكة برررشا للي تعبت الشانطي لي نلقاه نمشيلو و شي لا من حب يخدمني ، العشية خذيت ميترو و ميت بتعب و معندي فين نرقد هبطت وسط البلاد و تمشيت قعدت تحت المنقالة نخزر للكراهب و مبهّم و موش فاهم شي ،نسيت روحي و ضعت في مخي و نسيت شنعمل هنا و لا كيفاه شنتصرّف ، مشيت كلست شاباتي في نهج ابن خلدون و خذيت نعرش باكو بين ولا ليجوند و راجع ، دنيا ضلام و كان السهارة و الناس لي خارجة بنات محلاهم و محلا لبستهم ، نسمة الليل هابطة و نا وحدي و كان تليفوني صونا طلبتني امي قلتلها راهو هبطت و بينتلاها انو نا لباس ، نكذب و نا دمعة خانقتني نحب ندوش و نرقد عرقت عالاخر و تقززت من روحي ، الحداش تع ليل قاعد قدام بانكة الي مبعد داخلية و انتم دايرين على يدكم اليمين ، فما كرهبة متع حاكم تعدّت الشباك هابط قلي تحرك تحرك سرح ساقيك ، قتلو نعم ، قلي قوم نيّك من غادي لا نهبطلك .. هبطت راسي كي القحبة و تحركت ، الدنيا موش هازتني منيش قادر نخمم ، الزح معنديش بلاصة في البلاد هذي ، خممت ننتحر ، مشيت قعدة وحدي في القازون بكيت من غير حس ، و خممت فين شننتحر وكيفاش و مبعد قلت نمشي للبرط و نطلع و نتخبا و نمشي لاي بلاد ، سئلت روحي علاش الشي يصير فيا نا هكا ، ناس كل معاها شكون و نا وحدي ، عايلات و ناس و بنات ولاد و شياب و عزايز و نا وحدي ، توسدت صاكي خزرت للسماء ، سرحت و غلبني نوم ، نعرش قداش رقدت ، اما مفقت كان كي فما ثلاثة ولاد اصغر مني و قراب لبعضهم في العمر يتقوحبو عليا و يضحكو للي فقت. حبيت نشدهم بالواحد ندخل فيهم رجلي ، حبيت نشعلهم و نبقا نخزرلهم ، حتى في الشارع مخلونيش نرقد مرتاح حتى شويا ، مصهودين من البحر و لابسين خلاعي و في شلايك ، حسبتها قلت اخطاني لا نتوقف ، مشيت في محمد الخامس ،منتذكرش البنية لي رقدت قدام بابها، امانتذكر الدنيا سخانة و هيا المدخل متاعها رخام ، رقدت منغير مفرشت شي ، لا كردونة ولا حتى شي ، فرحات قبل قالي في الجيش سطوشك و سطيشك ، الفلوس عنديش محسوب و ترمتي لصقتها للحيط و رقدت ، قمت الصباح كي زيق الفجر منجمش نمشي جنبي رقد من البرد ، ممكن سويعة باش رجعت فيا الروح ، شاح عليا العرق و نحب ندوش ، مشيت للمحطة لي مبعد باساج و خذيت ميترو ، معبي فما طفلة وجها مننساشو ، تقلقت من ريحتي عندها حق ،اما يعن بوها و بو بوها خاطر متدريش اش صاير فيا و انو متشرد وقتها ، اريانة ، العوينة و ممكن وصلت لسفارة امريكا ولا منعرش ،درت درت سئلت عالخدم شي جفاف و قاحلة ، فما بلاصة ممكن كان راقد فيها شكون ، شريت باقات من حانوت و قتلو اعطيني ورقة ، كي خلطت للبلاصة. قسمت الباقات عزوز ، حطيت شطر و لفيتو بالورقة عبارة كسكروت. باش ميضحكوش عليا ناس ولا العباد لي تتعدا ، حشمت و مازلت نحشم انو نبان معنديش قدام لي منعرفهمش ، كليتها الكل ،مشيت لشانطي قتلو ميسالش نعبي دبوزة الماء قلي اي اي ، دخلت هوما لاهين ، نحيت مريولي و بردت حالي ، هوما لاهين الداخل و ثبتت مفما حد يعس عليا.. ، هبطت سروالي و نبل في روحي ما بين افخاضي و نبرّد تهريت من المشي و تعبت و نكره العرق .. زربت روحي لا يشوفوني فاش نعمل و رجعت للبلاصة و رقدت متكمش كي الصغير و لتوا نرقد هكاكا و نحمل مخدة ولا اي حاجة و اي انسان يمسني و نا راقد نقوم مفجوع و خايف. . ، تمنيت نرجع لكرش امي و سبيت النهار لي هبطت فيه للدنيا ، رقدت متعب و ارتحت ، قمت كان كي نلقا كلب يشمشم فيا ، فجعني فجعة لا عمري عشتها ،فجعني و فجع روحو منعرش شكون فينا خايف من شكون ، جيعان ولا نعرش شبيه و معندي منعطيه سبيتو و سبيت روحي و قمت .. تمشيت و منيش فاهم شكون شنكلم في تونس تع نمي ، قلت نهد على بن فليكة ، مشيتلو لوين كنا نعسو مع بعضنا ، عيظت شي ستنيت فين كنا نحطو في الكرسي شي مطلع حد كان واحد مدار لي كنت نعس فيها نا. يخدم فب بلاصتي جاني شيسئلني شنعمل هنا ، قتلو و حدثتو و الكل قلي راهو معادش هنا ، مكانش عندي فلوس في تليفون و فلوسي وفت و حشمت شنلقو هات حتى دينار ، اما قتلو تطلبهولي ؟ طلبو و عداهولي ، كي سمعت صوتو بكيت ، شدتني الغصة ،تفحع عليا و قلي شبي ربك انطق ، قتلو اطلبني عنومرويا ، طلبني و بعدت عالسيد و حكيتلو قلي ايجا وين الجامع متع نصر و اسئل على كذا و كذا و تو تلقاني ، فرحت ممكن في اللحظة هاكي حبيتو اكثر من بابا و اكثر من اي حد يقربلي ، رحمت عوالدين العساس لي في بلاصتي و قتلو اعطيني سيقارو ، قلي منتكيفش ، هزيت راسي لدار شدولة ، الاضواو طافية ، ضحكت و مشيت جيت عالمنزه 6 و نا نتمشا و نسئل و كي نلقا بونتة طويلة شويا نهزها ، فمهتش علاش كان نساء يرمو السواقر و ميكملوهاش ، هاو سليمز هاو نعرش شنيا ، لميت برشا بانت ، نبدا نعس كي نشوف بونتة لا يشوفني حد و نعمل هكا و نهزها ننفضها و نحطها في صاكي و نسب مولاها من العرق الاول ، نكره دخان النساء و خاصة كي يبدا مسخ بالروج الافر متاعهم .. وصلت فين الجامع متع النصر ، سئلت طيما قلي و كلمني هوا يخرنن خاطر ، خلطتلو ممكن ساعتين مالي كلمتو ، مكحل عنساء و نخزر للكراهب ز بقيت قاعد قدام البلاصة لي سرقت فيها كسكروتات البوليسية قبل و قعدت فيها شوي .. خلطتلو المهم مشيتلو بالحملة عنقتو و نبكي بالشهقة ، تاعب و جيعان و عارق و نحب نرقد و نحب نخدم و معنديش دخان و فالس ، تنكت .. ، صبرني و سكتت و قالي يا بن فلييييكة ، قتلو نا لو كان تعطيني نيييييكة ، ضحكنا ، جابلي كرسي من دار فهمت لي هوا سعس عليها و قعدنا ، تكيفت معاه و شربت تاي و ماء بارد و حكيتلو القصة كل ، قلي قداكش منيك ز حكالي هوا علاش بطل من غادي و قلي معادش فيها ريش ، نحنا هكاكا و خرجت مرا لباس عليها ، مدتلو بلاتو فيه ملوخية و غلة و خبز ، يتوشحل هوا و متكلماني شكرها و جابهم يضحك و قلي ديما قسمك جراي ا ولد القحبة ، ضحكنا خلاص و كلينا للي شبعنا و كرز كيفاه مينجمش ياكل اللحم كي العادة ، قلي اسمع عندي وين نبيتك الليلة و غدوة عنا حديث ، سهرت معاه برشا ، و مشا حل قاراج متع فيلا ، دخلني ليها حاطط هوا جراية و قلي هانو وين دوّش. قتلو اي اي ، ايا بن فليكة تحرك خل ندوش براس امك .. نلقا صابونة مسكة دوشت بيها و غسلت هاكا الدخلة متاعي و تمديت رقدت عريان باش نبرد شويا و نتنفس ، غطست في نوم ، عريان عجل .. الصباح قومني و هوا يكفر كي شافني عريان عجل ، لبست وحدين نظاف من الصاك متاعي و دبرت ساشي حطيت فاها الصليب و الخلعة و المريول لي منشرتهمش .. و خرجنا ، مشينا شربنا قهوة ، مدلي عشرة لاف و قلي برة للدار الي وراء ليساي كذا و كذا عهدي بيها ماليها سحتو العساس قلهم بعثني فلان الفلاني ، قتلو ا بن فليكة خي زبور مولاتها ، قلي ايا يزي بلا قحب و خل نروح ، انت بايت تفسي ههه. شيعتو شويا و مشيت كي خلطت قدام الدار نوقزت حكت معايا المعينة المنزلية قتلي المدام موش هنا ، بقيت نستنا قدام الدار ممكن ثلاثة سوايع و نا نتكيف و نخزر للوقت و ساعة نطلب ربي و نتشحت و ساعة ساعة نكفر و ندور عبلاصتي ، كرزت و جيت ماشي ياخي مرا في كرهبة حبست قدام الدار و هبطت منها ، مشيتلها ، خافت مني من الاول ، قلتلها سامحني نجم نحكي معاك راهو بعثني فلان فلاني و قلي تلوجي على عساس ، قتلي اي صحيح ، قلتلها كذا و كذا و راني نقرا و راهو نجم نخدم ثلاثة شهور لطارت .. و مديتلها بطاقة تعريف و بطاقة طالب ، حسيتها استرجلتني و تبسمتلي ، قتلي باهي يجي راجلي و نحكي معاه و خليلي نومروك تو نكلمك ، قلتلها باهي مديت يدي بش ترجعلي اوراقي قتلي لا خليهم عندي و تو نكلمك و دخلت ، مشيت لقهوة رخيسة بعيدة شويا عالبلاصة ، خذيت اكسبراس و دخلت بردت وجهي في توالات و شربت من غادي باش منشريش دبوزة ماء و رجعت عملت سواقر ، ممكن سويعة و نص طلبتني و قتلي ....

#لا_يتبع

#مقطع_من_الرواية

فما شخصيات بش يكونو حاضرين في حفل التوقيع و بش نكشفهم للناس ..

#يا_بن_فلييييييييكة